ಗದಗ : ಬೆಟಗೇರಿ ಕೆ.ಎಸ್.ಆರ್.ಟಿ.ಸಿ. ಬಸ್ ಡಿಪೋದಲ್ಲಿ ಪಾರ್ಕಿಂಗ್ ಮಾಡಿದ್ದ ಬಸ್ ಗಳಲ್ಲಿನ ಡೀಸೆಲ್ ಕಳ್ಳತನವಾಗಿರುವ ಘಟನೆ ನಡೆದಿದೆ.
ಡಿ. 19 ರ ಗುರುವಾರ ರಾತ್ರಿ ಈ ಕಳ್ಳತನ ನಡೆದಿದ್ದು, ಬಸ್ ಗಳನ್ನು ರಾತ್ರಿ ವೇಳೆ ಪಾರ್ಕ್‌ ಮಾಡುವಾಗ ಡೀಸೆಲ್ ಟ್ಯಾಂಕನ್ನು ತುಂಬಿಸಿ ಇಡಲಾಗಿತ್ತು.ಆದರೆ ಬೆಳಿಗ್ಗೆ ಚಾಲಕ ಬಂದು ನೋಡಿದಾಗ ಡೀಸೆಲ್ ಕಳ್ಳತನ ವಾಗಿರುವುದು ತಿಳಿದು ಬಂದಿದೆ.
ಬೆಟಗೇರಿ ಡಿಪೋದಲ್ಲಿನ ಬಸ್ ನಿಂದ 200 ಲೀ., 135 ಲೀ. ಹಾಗೂ 186 ಲೀ. ಡೀಸೆಲ್ ಕಳ್ಳತನವಾಗಿದ್ದೆ, ಒಟ್ಟು 3 ಬಸ್ ಗಳಲ್ಲಿ 44,806 ರೂ. ಗಳ ಒಟ್ಟು 521 ಲೀ. ಡೀಸೆಲ್ ಅನ್ನು ಕಳ್ಳತನ ಮಾಡಿಕೊಂಡು ಹೋಗಿದ್ದಾರೆ.
ಈ ಘಟಕದಲ್ಲಿ ಯಾವುದೇ ಸಿಸಿ ಕ್ಯಾಮರಾಗಳು ಇಲ್ಲದಿರುವುದು ಕೆ.ಎಸ್.ಆರ್.ಟಿ.ಸಿ. ಘಟಕದ ಭದ್ರತಾ ಲೋಪಕ್ಕೆ ಸಾಕ್ಷಿಯಾಗಿದೆ.
ಕಳ್ಳತನದ ಪ್ರಕರಣದ ಕುರಿತಂತೆ ಬೆಟಗೇರಿ ಘಟಕದ ವ್ಯವಸ್ಥಾಪಕ ರಾಜಶೇಖರ ಧನ್ಯಾಳ ಅವರು ಡಿ. 22ರಂದು ಬೆಟಗೇರಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಬೆಟಗೇರಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.
